Internet ke bay shumar faiday hain.
Lekin bad qismati se hum Musalman un faido se ziada Internet ke ghalat istemal ka shoq rakhte hain. Isi liye hamare bachay, jawan, aur burhay sab hi internet par fahash novel, filmay, aur gandi tasweeray dekhne main ghanto laga dete hain.
Lekin kya ap jantay hain ke bay hayaee aur fahashi ki cheezay dekhne se kis tarha ap ka dil o dimagh barbad hota hai aur kese apka eeman khatam ho jata hai? Ayye is article main hum apko ye sab batae.
Agar apka koi dost internet par porn dekhne ya gandi kahania parhnay ka shoqeen hai usko bhi ye article send karain takay woh is gunah se bachay.
Fahash Novel Aur Filmay Dekhne Se Kya Hota Hai
Hum muslaman hain aur hamaray pyaray Nabi Hazrat Muhammad ﷺ ne Haya aur Sharam ko eemaan ka bohat aham hissa bataya hai.
Jis shakh ke andar se haya aur sharam khatam ho jae uske andar se eemaan bhi khatam ho jata hai.
Jab ap internet par porn films aur gandi pictures dekhtay hain ya fahash novel aur stories parhtay hain to pehli martaba to dil bohat taiz dharakta hai aur dar lagta hai.
Lekin ahista ahista sharam aur haya khatam hoti jati hai aur emaan kamzor hojata hai jiski waja se phir ghanto bay hayaee ki zheezay internet par dekhtay hain lekin dil ko kuch nahi hota.
Yaad rakhay ye dil ke murda honay ki alamat hai.
Jis shakhs ka dil bay hayaee se na ghabrae uska dil murda ho chuka hai.
Kya ap chahtay hain ke ap qayamat ke din Allah ke samne is tarha pesh ho ke apka Dil eemaan se khali ho aur dil murda ho?
Kya hum apne pyaray Nabi ka samna kar sakte hain? Kaisa lagay ga jabn unke samnay hamaray amaal rakhay jaengay?
Jab woh ye dekhengay ke ye shakhs musalman tha lekin baya haya novels, aur gandi filmay dekh kar apni jawani barbad karta tha aur eemaan zaya kara tha.
Mere bhai, mot ke waqt kalma bhi naseeb nahi hoga agarr sari umar yehi peshaab pakahanay wali jaghay dekhtay rahay.
Tum musalman ho, apna muqam pehchano.
Jis waqt bay sharmi ke sath tum porn novel aur filmay dekhtay ho us waqt Allah tumhay dekh raha hota hai.
Woh dekhta hai ke maine is banday ko kitni nematain di, acha khana dia, acha kapra dia, lekin ye bay haya aankho ka zina ar raha hai aur apne hath se jawani zaya kar raha hai.
Pyaray Nabi ki hadith hai ke jo shakhs kisi ghair mehram ko dekhay woh ankh ka zina karta hai.
Tum to in gandi filmo aur novel ke chakkar main apna dil tabah karlete ho.
Phir namaz parho tab bhi wohi ganday khayalat atay hain.
Yahan tak ke apni sagi maa behen ko dekh kar bhi ghaleez batain sochte ho.
Allah ka khof karo.
Jab usne badla lia to kahin bhaag nahi sako gay.
Aur mot kay baad jab qabar main azab hoga to alag tarapna paray ga.
Abhi bhi waqt hai, apni taqat ko behtar kaam main lagao aur ye bay hayaee chor do.
Bay Hayaee Ki Cheezay Aur Gandi Film Dekhne Se Kese Bachay
Agar bay hayaee, fahashi, aur gandi baatain chorna chahtay ho to sab se pehle Toba aur Astaghfar karo.
Allah Taala se sachay dil muaafi maang kar pakka irada karo kay ainda ye kaam nahi karunga.
Uske baad Naik logo ki suhbat ikhtiyar karo. Yani tumharay ghar ke paas ya sheher main agar koi buzurg aalim hain to unke baas jaya karo, unki majlis main betha karo, insha Allah ahista ahista buri adatain choot jaengi.
Iske sath sath tanhaee main mobile aur internet ka istemal bilkul chor do.
Dekho jab tak himmat nahi karo gay ye addiction nahi chor saktay. Is liye himmat karni paray gi.
Lekin agar jaan lara do gay to insha Allah jaan choot jaegi
Warna martay dam tak isi ghalazat main paray raho gay.
Fahashi Wali Stories, Adult Novels Aur Filmo Se Bachne Ki Dua Aur Wazifa
Porn addiction, ganday adult novels, aur dil ko tabah karne wali fahashi se bachnay ke liye kuch dua aur wazifay hain jo insha Allah ap ka kaam asan kardengay.
Lekin himmat khud hi karna paray gi.
Fahashi aur zina se bachne ki dua hadith main ati hai woh ye hai.
Is dua ka mamool bana lo.
Is ke alawa ek alawa har Farz namaz ke baad La Haoola Wala Quwwata Illa Billah 7 martaba parha karo. Iska matlab ye hai ke Aay Allah main apki tofeeq ke baghair koi naik kaam nahi karsakta na hi gunah se bach sakta hu.
Bas har waqt Allah se madad mango aur agar gunah ho jae to mayus mat ho, koshish main lagay raho.
Tahajjud ke waqt uth kar achi tarha Wuzu karo aur 2-4 rakat parh kar Allah se ro ro kar madad mango.
Bas yaad rakho, tum musalman ho, bohat oonchay maqsad ke liye aae ho. Apne aap ko kafiro ki tarha ghalazat main zaya mat karo.
Warna ye fahash novel, stories, aur filmay qabar aur qayamat main bohat ruswa karengi.
Allah Taala hum sab ki hifazat farmae.